經營得法自受追捧

    風靡一時嘅私房菜，有謂已經開到荼蘼。不過無論如何，私房菜依然擁有不少食家追捧，皆因其私隱度較一般食肆高，菜式亦不時不食，不會流水作業般平凡。近月在西灣的雍泰美膳，便體會到私房菜之妙。

    店內只設兩間貴賓房，門外門內俱予人一絲不苟的精緻感，無論陳設、餐具、服務水平，一隻大拇指是受之無愧。出品方面，先來前菜香酥鳳尾魚看似平凡，但入口鬆化而味鮮，就這種不亢不卑陣勢先聲奪人。不得不提其招牌主打玻璃黑松露乳鴿，松露的幽香沁透在13-15日嘅乳鴿之上，帶點神秘嘅黑漆外皮，係拜墨魚汁所賜，入口鮮嫩juicy且味覺複雜，難怪唔少城中名人皆慕名而至。

    至於鹹香雞、富貴牡丹瀨尿蝦、冬菜油鹽蒸海斑，以及桂花瑤柱炒菊花翅等俱是水準之作，卻無太大驚喜。反而一道賣相精緻，貌似盆景嘅碧綠藤椒蘇格蘭蟶子皇，就絕對值得品題。蟶子嘅鮮味既不會被藤椒蓋掩，而藤椒嘅酥麻，亦扮演着下把嘅重要角色，替嫩滑鮮甜嘅蟶子，襯托至天花板級數……對！呢種咁微妙嘅化學作用，霎時令人勾起當年驃叔同熊良錫嘅經典組合。

    行筆至此，私房菜是否已開到荼蘼？個人以為就似經典民謠Both sides now（兩面看）般，實質是經營是否得法耳。

    ·紫紋卿·