黃衣頭骹粉漿炸嘥料

    珠海自從將情侶中路向北延伸打造人工沙灘，加上日月貝以及城市陽台先後出現，已成為遊人必到打卡熱點。於城市陽台內，據聞一家單單裝修就花咗一點八億嘅“珠海灣壹號 · 盛宴”，更擁有摘星嘅實力。講到咁巴閉，又豈能不探探其虛實？

    一入大堂，果然金雕玉砌熠耀非凡，該處除美輪美奐二樓大廳外，另有VIP房三十間，各有不同風格。粵菜同海鮮乃該店主打，於是在推薦下點了幾個撚手菜。個人在魚池閑逛時見到一條大黃衣，於東星與西星群中孤獨得頗有性格，隨即將之納入餐單內，順帶噏咗句：兩食叫廚房揸fit！點知就係隨口一句……出事嘞！

    約三斤重的黃衣，估計兩食應該離不開魚身起肉炒球，頭骹椒鹽或燜涼瓜耳。及至上菜時，大砂鍋以大量薑蒜粒同乾葱頭鋪底，魚身起肉切厚片，加松露醬蒸焗，這個整法又唔錯喎！弊就弊在憧憬最精彩嘅頭骹，既非燜煮亦非清蒸，竟然係蘸粉漿炸之。慘在粉漿又厚又索油，上碟一望已難勾起食慾，皆因衣魚類或斑類嘅魚頭，絕對係精華所在，而家搞到咁，你仲想摘星？

    但話分兩頭，該處其它出品都具水準，加上服務貼心環境一流，無論早茶或晚飯，確實係不錯的選擇。而錯就錯在嗰條孤獨嘅黃衣出現……唉！或許呢啲就係造化之過吧！

    ·紫紋卿·