峇里燒豬肋骨唔講得笑

    港澳人好口福，羨煞唔少地方食客，皆因世界各地嘅美食包羅萬有，幾乎食乜有乜，只要有市場需求，保證成行成市。當然，偶爾比較偏嘅菜式，如峇里菜，就似養在深閨。

    位於福隆新街斜路嘅刁廚 · 紐利，主打峇里島NURI'S燒豬肋骨，替食客提供另類選擇。或許唔少人認為：唓！峇里菜咪即係印尼菜，巴東牛肉成日食喇，有乜咁特別喎？咁諗好似冇錯，但就有謬之千里之嫌。

    先講這道招牌燒豬肋骨，在峇里連世界知名旅遊指南孤獨星球Lonely Planet都鼎力推薦，打造NURI成著名品牌，真唔講得笑。此外，個人比較欣賞金巴蘭風味藍青口。只可惜藍青口來自新西蘭而非法國，始終欠缺那種香滑嘅creamy口感。另外脆炸油甘魚骹更係必食之選，介乎椒鹽更勝椒鹽的味道，結論就係：一流！

    名字別致嘅咕喱羊架，“咕喱”並非廣東人所指苦力，而是峇里咖喱醬Gulai，此菜調味頗合個人心意，只是來自蒙古的羊架，一般人未必受落那種羶騷。需要預訂嘅香草燒雞不俗，香辣車輪牛舌腍滑冶味……尚有驚喜是餐後甜品海鹽菠蘿燒，將味蕾帶至另一個境界。

    至此油生一念，假若下次再訪此店時，藍青口換成法國貨，羊架來自新西蘭或澳洲，則完美二字，這家特色餐館應受之無愧吧！

    ·紫紋卿·