飯焦泡油好夢成空

    印象中大概六、七年前吧，傍晚開車路過中山火炬開發區，發現一家別致小店漁雅山房，昏黃燈飾與籐器配襯下饒具風味。原來是一家主打天麻魚頭火鍋店，一試才知別樹一幟。只可惜……或許是疫情或其他因由吧，月前再訪已芳蹤杳然。

    事有湊巧，近日在舊香洲區內，竟然發覺漁雅山房重現眼前，一種久違的味道霎時湧上心頭，當然立馬進店以解思念之苦。該店無論裝修、菜牌以及陳設等，同中山火炬店並無太大分別，只是主理者已人面桃花。該店湯底有六款，包括五指毛桃、土茯苓枸杞子、清補涼藥材、靈芝藥材、紅棗杞子清湯等任君選擇。但個人始終長情，獨愛天麻藥材湯底，貪其香遠益清，與魚頭配合得天衣無縫。此外，一般火鍋材料如牛肉、生蠔、甲魚、走地雞、風鱔、雞腰子等應有盡有，但愚見以為若在該店品嘗上述食物，嘥料耳！皆因該處除招牌嘅天麻魚頭火鍋外，鮮嫩幼滑嘅豬腦，混入黑木耳絲自家手打嘅鬆化豬肉球，加碟鱅魚嘴以及石岐中鴿，先至係上上之選。

    稍感遺憾係嗰煲瓦罉黃鱔飯。黃鱔同飯並非主旨，主角乃係飯焦，半碗飯焦撈天麻湯，絕對人間美味之最。但當日嘅煲仔飯全係油、油、油，至愛嘅飯焦竟然泡在油中，太傷人心啦！原先諗住happy ending嘅美夢，頓時幻滅。

    ·紫紋卿·