劉威煌自嘆緊張發揮差

    前晚，《中年好聲音2》舉行謝師宴，彭家麗、韋綺珊、肥媽、 李麗霞（黑妹）、谷婭溦、吳大強及車婉婉及一眾參賽者黃劍文、劉威煌及向展鵬等亦有出席。晉身廿四強的黃劍文與劉威煌都很開心，再次參加歌唱比賽的劉威煌，直言今次參加節目跟當年參加比賽很不同：“今次同其他參賽者成為朋友，會互相提點大家，唔會勾心鬥角，之前三十幾歲參加歌唱比賽，啲人係勁會想入行做歌手，因為我年紀大啲人唔敢指我有錯誤，而家心態同年紀大咗，加上大家又多歷練！”他又大讚對手安雅希、顏米羔的表現相當喜出望外。至於他自己對比賽就沒信心，“發現自己有不足之處，在台上亦很緊張，發揮不夠自如。”

    黃劍文更為了能專心比賽，由元朗搬到港島區居住，雙眼掛上大眼袋的他說：“因每次來回加埋彩排都唔夠時間休息，我係同朋友分租，工作方已排到明年，都可以應付到生活，及負擔到外公生活費。”對比賽可有信心？他說：“我覺得不斷要狀態好，唔可以心散，不過之後我會化濃妝好Rock演出。（可有策略應付比賽？）遲啲都想唱快歌跳舞，尹新杰跳舞好勁，都有向佢教路。”