馬國明新劇狂啜何依婷

    湯洛雯彈未婚夫唔入戲

    昨日，兩位準人妻湯洛雯與何依婷，亮相婚嫁服務頒獎禮，靚湯與馬國明婚前不停接工作搵銀，她笑謂好托賴，工作多多都唔拘，因為辦婚禮的花費的確不少。籌備年底的婚禮以來，靚湯一直親力親為沒聘用婚禮統籌師，不過亦因此要自己出動去講價慳錢，變成了精明師奶，她說：“我經常要去講價叫收平一點，但馬明覺得都是小數目。”

    在新劇《新聞女王》中，馬明跟何依婷多場激咀戲，靚湯說只看到二人在後樓梯激咀的一場：“我覺得好好笑，當然冇呷醋啦，我未入行他已經拍不少親熱鏡頭啦，最記得《On Call 36小時》同楊怡（楊茜堯）咀。”馬明劇中角色花弗，但靚湯直言彈他入不到戲：“同埋佢唔好同我講那些對白，我會嚇親。”她又說對馬明拍親熱戲沒太大反應，相反馬明會叫她要拍也最好只蜻蜓點水。這樣似乎很不公平？她笑說：“男人都是佔有慾強，是正常的，如果他說不介意，我會仲驚，但他都會尊重我，拍之前會問吓我。”

    湯洛雯談到籌備婚禮，覺得慳埋可以去多次旅行，但她們一開始籌備婚禮時，已經講明不可以嗌交，所以一遇到忟或好累時，大家就先冷靜一下，到現在兩人都沒有嗌過交。靚湯與馬明年底到亞熱帶地方舉行婚禮，靚湯說是考慮雙方父母年紀大，不宜坐太長途機程。至於婚禮日期，她仍保持神秘，只說聖誕節會在香港過。

    談到馬明預告會在婚禮上跳舞，靚湯指已請來舞蹈老師教他倆跳舞：“其實不是要玩新郎，是外國好時興一對新人在婚禮開始時共舞，拍下片段會好有紀念價值，所以請了老師來教我們，還叫老師教馬明一些超容易的舞步，只要佢棟喺度帶住我轉個圈。”