李龍基攬嫩妻説AI

    攬實年輕自己三十六年嫩妻，聲言“有心有力”的七十二歲李龍基，與七十九歲葉振棠舉行《雙生雙識2023》演唱會；嘉賓九十一歲胡楓、七十七歲Joe Junior……。修哥笑言，這是三二一演唱會，最老級別歌星聚合，暢談最新尖端科技話題——AI尹光！

    霎時熱爆的網紅：AI尹光。翻唱林家謙《一人之境》及姜濤《Dear My Friend》，前輩歌星似回復青春之勢，成了熱話……。“都有留意”，李龍基、葉振棠表示——完全唔羨慕尹光因而成為網紅。我們是老友，聽尹光自己講，“都唔鍾意”。點解呢？眞係冇感情。老實講，雖然與原唱調子、歌詞絲毫不差。但，每個人唱出來都唔同，因為，每個人都有特色。基哥説，《忘盡心中情》曲我唱，就唔及棠哥的聲線和唱工。所以，AI！NoWay。死死實實的音響和聲線，聽來有甚麼意思……。

    貪新鮮，熱話題，“AI尹光”上架三周，九十二萬點擊率。軒仔自言，每日瞓醒必聽一次。“收到大家好多訊息，多謝大家，尹光始終係尹光。”尹光社交平台回應，“由頭到尾都係做返我自己，有時悲有時喜，有時刀仔拮大髀。不過，你仲有我，我仲有你。尹光仲係尹光。”眞我，無可取代。

    “不錯，電腦可以做到結他聲，但，冇人彈嗰種感情。”李龍基補充，“現在，不少人聽返膽機，其實失眞率高過原子粒，但係，有人仍然愛聽膽機，因為有少少瑕疪，才零舍好聽。眞！人始終係人，不會百分百完美，好得意，視聽之娛，就係唔鍾意太完美無瑕嘅嘢。”

    口之於味，各如其面，既然生活在自由商埠，眞唱眞演，還是AI，自由競爭下，觀眾“一人一票”決定。基哥踢爆，指棠哥最近匹馬走天涯，靠把口，遠赴美加去掘金……。

    啱啱美加演了十二場騷……。葉振棠坦承，今次特別辛苦，“冇得瞓，因為，每個騷唔同埠，一連七日，每日只睡兩小時，做完騷，宵完夜，瞓兩粒鐘就去機場，又飛第二個埠，嗰晩又接着唱，好辛苦，估唔到自己捱到，始終年紀大……。”

    咩呀，棠哥老當益壯，美加返來，已買了三層樓……“三粒衫紐呀！”棠哥自謙打圓場，並指基哥下月美加出騷。“知名度沒棠哥咁高，暫時接三、四場，藝人就係咁奇怪，到時就能捱到，鍾意唱吖嘛。”

    高  梁