曾志偉談“造馬”

    《中年好聲音》大結局，響起一片“造馬”喧聲，單位領導人曾志偉回應：沒有造馬！講到藝人上位，志偉最有資格講——係馬，唔使造。唔係馬，造唔到係馬。

    曾志偉是隻“示範馬”，現是娛圈幕前幕後大紅人，手下兵強馬壯。馬！怎樣來的？志偉是教科書……他出身預備組足球員，抖暑期間，冇得撈，與波友洪金寶好熟，隨隊到台灣玩吓，看拍戲。“有興趣試吓做龍虎武師？”咁都得，武師與球員同一技巧，反應敏捷準確，一球飛來掌握罅隙竄前頂頭槌……武師一樣，主角一個打十個，持刀亂劈，武師看準來勢，大叫一聲哎呀倒地，要準；不能太快死，也不能劈極唔死。跳吓跳吓可以搵到食……

    麥嘉美國回來，造馬了，運動健將曾志偉被收為“副編劇”，自己是正編劇。“佢就話在紐約讀電影，佢廚藝了得，懷疑是廚師。不過，與編劇同一特技，將各式各樣炒埋一碟，好睇又好味。”

    故事不好，情節不吸引，造乜都沒有用，曾志偉又被造“馬”成了大導演……他列為“奮鬥房”七怪之一，晩晩十一點開會，早上七時散會，劇本每一節每一句，細意琢磨。霎時擔起第一部《最佳拍檔》的導演，緣來七怪的集體創作，誰對這劇本意見最多，而情有獨鍾，都可以拍心口說：“我做導演。”對劇本有感情，拍得特有味道，不須造作。

    曾志偉從“福星系列”走上幕前，這個諧星惹笑形象，無意中被民意造出來的；他大鋪工作癮，俗稱抵得諗，出任福星副導，設計一位演員的戲，總是有點不如意，但他每次示範時，周圍爆笑。這位演員自動辭演，由志偉替上，無意中製造了一位諧星……

    志偉肥壯，聲線高八度，無心插柳的“造聲”。名伶林錦堂經常到曾家開唱局，大鋪癮的志偉扮花旦，唱子喉多了，成了老牛式尖音……一位古靈精怪的奇才，誰造就呢？形勢所迫，上天安排。

    高  梁