蔡潔讚胡定欣專業細心

    新劇《廉政狙擊》早前在內地已率先開播，劇中蔡潔與胡定欣最多互動。雖然這次是兩人首度合作，但原來早於蔡潔入行前，她們已“合作”過。蔡潔說：“嗰時我喺澳洲選完美之後，去咗一間華人雜誌社寫專欄。喺我入職唔知第一定第二個月，定欣就去咗澳洲，我就採訪佢。嗰時佢篇專欄係我寫嘅，亦算係我喺嗰間雜誌社寫嘅第一篇藝人訪問，所以都幾有緣，我一直都覺得佢好專業好靚。”

    談到劇中與定欣勁多互動，蔡潔笑言獲益良多：“我算係喺VIP位置去睇定欣表演，我覺得佢真係游刃有餘。同埋有一排我有啲心事，我好Open同佢分享咗，佢又畀咗好多意見我，我都好Surprise，佢係好好嘅聆聽者。”蔡潔更感激定欣於去年台慶幫她揀戰衣：“我着咗條黑色裙，好多人讚，其實嗰條裙定欣有份幫手揀，所以好開心認識到佢呢位朋友，希望以後再多啲合作。”