經典名片功夫深

    域陀弗萊明，第一次世界大戰美國情報局攝影師，因曾陪同總統到訪歐洲，出版過總統專集，戰後被荷里活電影公司招為攝影師。早期也曾拍過影片獲提名奧斯卡。弗萊明此人亦僅係荷里活影史滄海一粟耳。

    域陀公無驚天動地大新聞，史上波瀾不驚，能記得此人者，恐亦冇幾個。然佢有兩部影片，卻係影壇傳世之作，不聞其名者幾稀矣。《綠野仙蹤》、《亂世佳人》，炙手可熱，百年間歷演不衰，未睇過者唔算真影迷。

    《綠野仙蹤》於無電腦年代，竟能拍出如斯效果，導演絕對係超人。此片畀域陀公玩到出神入化，難怪觀衆眉飛色舞。《亂世佳人》簡單古仔竟可拍到蕩氣迴腸、要生要死，公仔可以畫出腸，導演功力見真章。

    兩片皆入選美國世紀經典前十，域陀公乃史上唯一得此殊榮者。其後拍英格烈褒曼《聖女貞德》衰收尾，唯卻留下浪漫愛情故事。七十四年前今日，《聖女貞德》首映兩周後，域陀公殁於心臟病，年僅花甲。

    西門公子