不談風月只談歲月

    飲食界“鶯高”日前與一眾叔父飯聚，地點不設在星級的食店，選擇在不起眼的河邊新街仝羽茶居。該店地方細細但勝在夠風味，如果喜歡一盅兩件，仲可以提供焗盅泡茶。當晚座無虛席，疫情下可算是奇景。

    中心掌門人怕海鮮有腥味，選料要特別迎合。六條友菜單：自來德仔記脆皮燒鵝、游水龍脷、香煎蠔仔烙、煎焗鮑魚拼大花蝦、生拆瀨尿蝦蒸水蛋、乾葱豆豉雞、瑤柱花甲浸番薯葉、原煲臘味飯。

    每條約四両游水龍脷，六條各半蒸及炸，掌門人畀足滿分。瀨尿蝦蒸水蛋掌門人謂冇腥味、仲親自主持光盤儀式。香煎蠔仔烙不亞於當年葡京潮州酒樓，原來是食家梁自帶來薯粉烹製，仲有私貨胡椒粉，真吹脹。食家梁話乾葱豆豉雞有落糖醋，重溫到昔日翠園酒家風味。水王才子稱煎焗鮑魚拼大花蝦，以豉油皇煎焗，製作是水準之上。瑤柱花甲浸番薯葉夠嫩滑。煲臘味飯是自來黑椒腊腸，效果中規中矩。

    廚房部因放假只有三人，大廚製作忙且認真；副手不貼式一腳踢；另一位以往角色稱什婆，當晚兼做埋打荷，稍為清閒時間又出廳面執碗收碟。樓面各人齊心一直忙個不停，老闆娘更事事親力親為。

    眾謂現今投資環境租舖及物業貴，人資高且缺，難復當年盛況，如何承傳且看政府政策及新一代努力。各老餅笑談當年飲食軼事，一壺清茶，戒酒戒色（有色汽水飲料），只談歲月，不談風月（因為有太座在旁）。筆者見“鶯高”愜意當晚飯局，描述仿似西門公子上身！

    普洱茶