何展睿心痛太太暈倒

    唱作歌手何展睿Steve一八年與相識十年的太太結婚，本月十二日為二人結婚四周年紀念日，中國俗稱“花果婚”，意指婚姻像花果一樣香甜， Steve特意為太太送上花果味香水、香薰蠟蠋禮物慶祝，相當有心思。Steve感激太太在工作及生活上的付出：“自己一向係工作狂，大部分時間放喺音樂上，加入樂壇後更忙，音樂中心同樂壇事務多得老婆幫手，返到屋企又要洗衫煮食。佢廚藝好勁，識得煮家常小菜，真係一個多功能太太！”

    講起太太早前於公眾地方暈倒，Steve仍有餘悸：“記得有日教緊琴，太太自己去捐血，突然收到佢訊息話自己啱啱暈咗。可能當日太熱，佢血糖太低，太太講返自己係輕鐵暈倒，仲扭傷腳，話聽到乘客喺耳邊講call白車佢就醒返。個刻嚇到我呆咗，令我唔知好嬲定好笑。因為佢竟然淡定講返事發經過畀我知。真係要多謝一班有心乘客同工作人員關心，我以後都唔會畀佢自己一個人去捐血啦！”