馬龍仔影史留痕

    馬龍白蘭度，戲迷當想起域陀 · 哥利昂，不怒而威之江湖黑老大，影史上無人可出其右。電影《教父》之成經典，皆因導演哥普拉慧眼識荊，馬公係哥利昂上身，兩人天作之合，空前絕後。

    馬龍仔自少有扮嘢天份，乃父卻將之送入軍校。牛頭唔搭馬嘴，佢卒之棄武從文，入讀藝校。

    有回導師出題測藝：你哋扮雞，炸彈臨頭，請演雞況。衆生即時雞飛狗走以避難，獨馬仔泰然處之，曰：我要痾蛋。師大惑不解。馬仔曰：我係雞，點知炸彈係乜，點解要走？

    佢拍戲自有怪招。導演叫開機，一於唔理，照傾閑偈。傾吓傾吓，忽然入題演戲。因演來自然而入肉，導演亦冇符。有此天份，難怪演乜似乜，得心應手。

    兩獲奧斯卡，百佳演員排第四。所演者譭譽皆無缺，《碼頭風雲》、《巴黎最後探戈》兩走極端，然影史留痕，亦無憾矣！十八年前今日，馬公西登極樂，齡八十。

    西門公子