軍事癮起

    男人天生有“軍事癮”，一經觸動，一發不可收拾。湯告魯斯新戲《壯志凌雲：獨行俠》近日再掀軍事熱，聽說G-1和CWU-36P兩款經典軍褸熱賣。無錯，大熱天時照買，而且貴有貴買、平有平買，淘寶六百元有找，想買原版美製就需多付幾倍甚至十倍以上。

    軍褸不是人人適合，一來軍綠色、迷彩等不是個個都啱襯，不夠高大或者太肥、太瘦又差少少，你估人人都係湯告魯斯咩？軍靴亦如是，相對而言，軍錶易“入口”得多，更是男人至愛，地位超然，長盛不衰。

    講起軍錶，記得高中畢業旅遊去北京，男生最大娛樂及目標，就是買前蘇聯軍錶。當時不同旅遊景點如八達嶺長城、天壇、王府井等，都有賣軍錶地攤，款式非常多，海、陸、空軍齊備，飛機、大炮、潛艇、鐮刀、斧頭各適其適，外觀精美，且清一色全機械，回澳後買條錶帶就戴得。更重要的是，價錢便宜，記憶中一般由一百多到三百元左右即有成交。

    當年的男生幾乎人手一隻或以上，在回程的卅六個小時火車上，一大班人拿出戰利品評頭品足，相當過癮。然而，不少同學仔回澳後呻笨，做了水魚。這些所謂軍錶很快便壞掉了，大部分應為山寨貨。不過作為回憶，不錯；作為教訓亦得，邊有咁大隻蛤乸隨街跳！

    強  生 hengut@gmail.com