譚詠麟撐“老六兄弟”突襲錄音室

    明星足球隊“老六兄弟”衛志豪、莫家淦、張智軒、潘梓鋒、羅鈞滿和伍偉樂，前晚六位成員精神奕奕拉隊現身新城廣播，接受由薛家燕、范振鋒、思敏主持的《開心大派對》節目錄音訪問。

    訪問中途，譚校長（譚詠麟）為力撐“老六兄弟”突襲驚喜現身錄音室，令到全場驚喜大叫，整個錄音室都笑聲不絕。家燕姐問阿倫為何特別提攜這班年輕人？阿倫笑言：“我冇睇好佢哋，佢哋係靠自己，將自己化腐朽成形。”所以畀機會他們？他說：“我哋（明星足球隊）每次出外都有個環節與眾同樂，同啲球迷一齊唱吓歌，成日唱《萬水千山總是情》，咁不如搵隻歌可以又唱又跳。”要唱你的歌？他笑說：“梗係要唱我啲歌！哈哈！”至於何以有“老六”成員出現？阿倫直指因為眾人不怕蝕底，他稱：“呢個圈都係咁，成班人食飯期間，要有人唱歌搞吓氣氛，佢哋一個個行出嚟，又唱得唔錯，所以唔怕蝕底就有着數。”

    早前傳出阿倫和老友陳百祥（阿叻）因明星足球隊“分家”問題而鬧不和，兩人亦未就事件作出回應。阿倫直言：“出面啲人成日都問我係咪同阿叻唔啱？點會唔啱呀？幾廿年朋友，唔會為咗呢啲嘢。”