江嘉敏做善事派福袋

    江嘉敏(Kaman)剛宣佈離開舊東家後，首個活動就是聯同HOY TV《健康關注組》台前幕後落區做善事，派福袋畀老友記，真係人靚心善。

    身穿白恤衫短褲的Kaman在監製張志明帶領下，與《健康關注組》的敖嘉年、吳雲甫、麥詩敏、李婷婷、唐浩嘉、洪韻騏等往旺角社區會堂派發福袋給予老友記。首次攞HOY TV咪牌嘅Kaman分享道：“真係好奇妙，因為在舊公司九年，坦白講真係有啲唔捨得，最唔捨得梗係一班同事啦，當啲散水餅運到我屋企，我一打開……我真係有落淚。”離巢後有不同的工作邀請：“我真係估唔到反而係唱歌嘅工作比較多，問我有無興趣唱歌，梗係有興趣啦。”

    該活動原本有歐倩怡(Cindy)來參與，不過Cindy身體不適就由敖嘉年頂上：“每次佢哋見到我哋都好開心，有啲似睇返以前嘅劇。”吳雲甫立即插口說：“佢真係好識氹班老友記，個婆婆認到佢，佢竟然叫人妹妹喎，個婆婆不知幾開心。”新婚不久嘅麥詩敏就被催生，可以收多啲利市，佢就話暫時未有此計劃。