歌王豈會唔識譜

    巴伐洛堤，全球至靚聲男人，其聲既靚且高。唱歌之人至怕一音，係高音C，此乃聲樂“珠峰”，難以登頂。然巴公信手拈來，開聲就到，隨唱隨有，無人可及，譽為“高音C歌王”。

    巴公早有天賦。弱冠之年，已音高超人，常被鄰里投訴擾人清夢。成年扶搖直上，不獨高音登頂，事業亦登頂。偶被人發現彩排唔睇譜，巴公遂被傳唔識樂譜。歌王竟然唔識譜，樂壇一時傳為笑柄。

    巴公冇你咁好氣，照排照唱。有次來華訪問，中央電視台問佢：真係唔識譜？“非也，唔識樂團總譜耳。我教音樂，點會唔識譜！”

    巴公享譽全球，為人卻不敢恭維。佢係甩底大王，隨時放飛機，有音樂廳乃至明令佢終生禁入。兼之難服侍，酒店被褥例搞至一鑊粥；佢嗜肉，要酒店提供私人切肉機；飲水要指定名牌。雖如此，憑其極高造詣，佢仍廣受樂迷歡迎。十七年前今日，巴公以七十一齡仙逝。

    西門公子