伍姑娘籲留港消費救食肆

    一連四日的復活節假期昨日結束，不少港人北上消費，令商店東主叫苦連天。伍詠薇（伍姑娘）好心痛睇到新聞報道好多食肆結業，在個人社交平台發文，呼籲大家留港消費：“假期開始，好多朋友仔都出門享受假期，而我就決定留港消費，大家不妨留返啲錢錢喺香港消費促進經濟。老實講：我真係好心痛睇到新聞報道好多食肆結業，又或者仲有啲倖存嘅都頂得好辛苦，我希望大家共同努力，無論點都好，救救香港食肆同其他在水深火熱之中嘅其他行業嘅店舖。”

    伍姑娘又留言，希望香港食肆行業服務員爭氣：“香港曾幾何時出名係禮貌之都，大家從事服務性行業嘅自己友，要爭氣，食物水準固然重要，服務態度好緊要，總之要爭氣爭氣爭氣，咁就更加多自己友支持”。有網民批評有啲服務員態度極之惡劣，伍姑娘亦有遇過：“係嘅我都遇過，我會禮貌同佢哋講咁樣會趕客，我係出自好心，就算對香港嘅客人甚至乎外地內地嘅客人，都應該係有水準有效率同埋有禮貌，食物質素好之餘，服務態度都好緊要。” 當日伍姑娘坐言起行，慢遊香港幫襯食肆振興經濟：“噚日一出街就食食食，然後由中環行到去金鐘，假期慢活節奏步行仔細看風景，天清氣朗底下嘅香港真係好靚，遊客上身遊走市區好開心” 。