車路士爭報“喜”

    【本報消息】英格蘭聯賽盃八強，車路士主場出擊硬撼紐卡素。兩隊近況同樣一般，車仔主場出擊有利睇高半線，面對客戰表現差的紐卡素，藍戰士或有望借助史丹福橋球場地利捕“鵲”晉級。

    車路士、紐卡素八強碰頭，車路士地利出征先佔先機。雖然車仔近況麻麻，前線史達寧、積遜、梅特歷等入球能力未算強，不過今夏從曼城來投的新星彭馬演出有驚喜，配合E費南迪斯、加拉查等中場，車仔前場人腳仍不差。惟後防門將R山齊士、高維爾等發揮不穩，防線仍要靠年屆卅九歲的老將T施華，為車仔防線帶來不少隱憂。能否把握主場地利，成車路士爭勝最大籌碼。

    積遜：鋒將重拾狀態

    車仔射手積遜有信心：“我認為球隊已漸入佳境，尤其鋒線幾名球員重拾狀態，成功展現出入球能力。我認為我與史達寧、彭馬等在鋒線合作已漸有火花，大家都有入球機會，我相信是協助球隊贏波的好開始，我們對未來的比賽充滿信心。”

    紐卡素近況麻麻，雖然聯賽大炒富咸重返勝軌，但近五戰僅兩勝三負。喜鵲最大隱憂，為客戰表現差，各項賽事已五戰不勝兼輸四場，當中作客連續兩場大敗愛華頓及熱刺腳下。紐卡素目前受傷兵困擾，當中首席門將樸比因傷長唞，副選的杜貝利基實力明顯有距離，令紐卡素防線出現漏洞。幸前線C威爾遜、哥頓、伊沙克等有不俗表現，能否克服作客不利因素，以攻代守或成紐卡素爭勝的關鍵。

    愛華頓主場爭劫“富”

    愛華頓主場出擊鬥富咸，拖肥糖聯賽被扣十分後，一口氣四連勝搶十二分，大振士氣，雖然利雲、麥尼爾進攻火力未算銳利，但中場杜哥利有不俗入球能力，後防M堅尼、巴夫韋迪等近戰後防把關更見突出，連續四場不失球，表現夠穩健。富咸上戰聯賽淨吞紐卡素三蛋，作客三連敗。雖然門將利奴加上鋒線占美尼斯、列特及威爾遜等領軍，整體人腳不差，但愛華頓氣勢正強，又有葛迪遜主場地利，拖肥糖有力贏波晉級。