完成美國巡唱返港慶生

    李克勤感恩工作不斷

    最近，李克勤剛完成四場美國巡迴演唱會，剛好能趕回香港與家人共度他的五十六歲生日。被問及今年的生日願望時，克勤笑言：“都係咁上下，願望最好不要公開，免得唔靈驗啦，哈哈。我只可以講，二○二三年係好感恩的一年，無論工作或健康，所有都順順利利，非常充實同開心。多謝各方好友的祝福。”

    談及這次美國巡唱之旅，克勤表示：“以前要我執兩星期衫是非常頭痛的事，但這一年來飛到甩碌的生涯，已經把我訓練有素，成為一名執行李專家，並且出門會連小型洗衣機也帶在身邊，這樣便不用內衣褲都帶十幾件咁煩，減輕一下行李的負擔。不過，今次都有‘蝦碌’的一面，就係唔記美國電壓同香港唔一樣，帶咗個洗衣機去之後，先發現用唔到，最後為咗個洗衣機我再撲去買個變壓器。（為何不用酒店的洗衫服務？）首先聲明，我並非潔癖，只係諗到酒店的洗衣機一年三百六十五日洗不同人的衫，就覺得不如自己洗。”

    克勤今次在美國的四場演唱會反應熱烈，歌迷還向他大派利市。他笑言：“多年來，無論咩日子，都一定有歌迷畀我利市，我覺得自己真係一個好幸運嘅人。今次仲有一啲朋友，利市封都懶得入，就咁一百文美金派埋嚟，好鬼誇張。我在台上有一刻閃念：現金收唔收？最後都係開心接受。利市呢啲嘢，老人家教落，推走利市唔吉利，所以我要學識開心接受大家送來的祝福，真心非常多謝大家，利市都係照舊收，全部都捐去兩個仔的教學基金。”

    此外，克勤趁有少少時間留在美國休息，感恩節亦於美國度過。

    克勤又謂二○○三年對他來說，是非常值得感恩的一年：“可能係我成世人飛得最多的一年，工作幾乎冇停，每個月最少飛五、六次，不停巡唱、商演；繼完成香港紅館、澳門、新加坡等地巡演，今次又順利完成美國四場演出，聖誕節我準備送畀自己一份聖誕大禮，就係咩都唔做，休息一下，同屋企人一齊去旅行度假。”