吳林峰自彈自唱睇貓紙

    前晚，吳林峰、葉振弘Marco@P1X3L、胡希文（YoYo）等主演的舞台劇《小塵大事2023我也流淚的》，舉行首場演出，吳林峰在劇中要自彈自唱，他坦言都有靜雞雞望貓紙，他說︰“我唔係好緊張，但每個唱歌位，我都好淆底，因為我次次唱嘅歌詞，自己都唔知啱定錯。所以我有時會望下面（有貓紙），演到中段時，先至冇想像中咁恐懼感，我相信之後應該會更好。”演出經驗豐富的YoYo，對加開一場感到好鼓舞，而首場演出的表現，她說︰“今晚及格，但可以更好，最緊要係個班底，有型男同才子。”至於邊位係型男，邊位係才子，YoYo笑指︰“你哋兩個自己分啦！”

    當晚MIRROR成員的Jer（柳應廷）、Jeremy（李駿傑）、Stanley（邱士縉）和Error成員Dee（何啟華）到來捧場。《小》劇開售以來反應熱烈，前晚開騷前夕，大會宣佈加開十二月三日一場，全劇共演出十一場。首場開騷演出順利，完騷後吳林峰、Marco和胡希文（YoYo）在後台談首場演出的感受，Marco自爆標冷汗又胃痛，他說︰“我有少少遺憾，以為可以鎮定到自己，出台後望出去都唔知望邊，緊張到胃痛，又標冷汗，好似第一次做騷嘅感覺。”