北山食西餐平得過份

    珠海南屏北山，早年是潮人尋根勝地，而今其火旺之勢更趨熾熱。該區集古雅與現代於一身，更不乏多元化一流美食。最近造訪一爿令人驚喜的小店 TIO叼 · 地中海創意菜，其精緻而用心營造出品，無疑打開囿於“國內西餐”的一片天。

    首先，該店出品十分的骰，近似西班牙嘅Tapas。就以主菜濃蝦汁扁意粉為例，目測估計唔超過二十條意粉，捲伏在黑漆坑紋瓷碟上，放上小蝦仁、燒車厘茄及蕃茜，賣相一流且美味。但與三位朋友分享，每人唔夠一箸，咁大膽嘅出品，只有星級餐廳才敢如此。難怪評論區內，經常受到識少少扮代表一族不友善抨擊。

    就是如此，四兜友可以order十幾個菜，太過癮耳！加利西亞八爪魚腳，拇指般粗壯嘅魚爪，低溫慢煮口感軟綿且帶點焦香；生煎白菌及法式牛小排，同樣青醬做汁，卻帶出不同美味口感；香煎墨魚腸配綠豆蓉、摩洛哥式燉牛肉丸所用嘅香料恰到好處，令人愉悅。至於西班牙香酥黑毛豬肋骨，跟那道紅椒醬拌炸薯角，又是毫不起眼的美味。值得重點品題乃甜品，芝士蛋糕及西多椰子雪糕，近乎極品……

    那夜，自攜兩瓶四級莊周伯通，四位好友就暢酣愉快地度過半個良夜，埋單連開瓶費亦不過區區之數，太過份了！難怪北山一帶會如此旺場。

    ·紫紋卿·