無心揷柳竟成陰

    六十九年前今日，一部電影首映驚爆日本，萬人空巷。日本人二戰飽嘗原子彈，驚魂未定，忽聞史前巨獸又來襲東京，登時嚇到鼻哥窿冇肉，有你冇你，睇咗至算。由是此片一時大賣。

    《哥斯拉》，自此紅遍全球。更食完返尋味，續集陸續有來，乃至健力士大全以“最長系列電影”載入冊。後有人將之炒埋一碟，剪輯全集合而為一，成為花旗版，又賺一筆。此史前怪獸橫行銀幕數十載，已陪大幾代人。

    《哥斯拉》面世全屬無心插柳。當年日本與印尼合作拍片畀人放飛機，無奈之下唯有自尋生路。適時戰後原子彈陰霾未散，日人聞核色變。好，整隻怪獸嚇多一鑊！人心惶惶，最好賺錢。

    此片如今觀之，場景假到出汁。當年尚無電腦，有此效果，已然超前矣！怪獸模型重逾百斤，演員居中扮演，僅三分鐘耳，真係暈咗。片中逾半場景皆如此，演者之勞苦，製作之不易，可想而知。

    西門公子