女人硬凈不利愛情

    人生旅途掘金時，聲清氣足的“黑妹”李麗霞，發現頸椎有一個直徑四厘米腫瘤，病不單行，又肺部確診癌症，沒有最慘，只有更慘，病有三至……切除左邊肺葉後，再發現腦部有腫瘤——切除癌細胞後，幸好沒有擴散，毋須繼續治療。“但，我覺得，有癌病的人，不會好返的，不會斷尾，有時是上天決定。好多朋友都話，唔覺得我有病，總之，開開心心過每一日，唔好記住呢件事，否則會過得好辛苦……。之前，每年都有‘舊嘢’畀我，差不多每年都入手術室，希望以後唔需要……”

    二十歲開始抽煙，“年輕時百厭”，黑妹語重心長告誡年輕人，“到了年長時，要還身體的債……”患癌期間適値疫情，“心情很灰”，黑妹承認，“又唔知自己幾時死。疫情無工作，眞的好慘，好似接受死刑咁，唯有休息下。好好照顧自己身體。經契女羅敏莊介紹，決定學唱歌——跟唱歌劇的後生仔老師上堂，我不是要老師教我唱歌，是要老師教我開返把聲。”以前唱歌是為了搵食，現在，唱歌享受舞台，完全兩回事。

    黑妹坦誠，後生太百厭，老來要還身體債，性格決定命運的話，“女人太硬凈，對感情不是好事……”黑妹自爆，第一段婚姻，沒有正式結婚：十七歲生女，母女不久分開，這段感情只維持兩年。“當時心想，如何養大個女呢？好彩有媽媽幫手，咁多年來，高高低低，這段時間最辛苦……”世上只有媽媽好，有媽的孩子像個寶。“十七歲生小朋友。媽媽當然好激氣。其實，媽媽不贊成我唱歌，唱了兩年，我還大肚，媽咪好嬲，最慘我仲要出去搵食，畀個女佢凑，媽媽她惜我。”

    第二段婚姻，正式註冊。黑妹嫁去加拿大，“見到冰天雪地，立即想返來。”黑妹自言，“當時三十歲未夠，第二任丈夫對我對女兒都很好。但，我細細個賣唱，沒上過學校，唔識講又唔識揸車，日日悶坐家中或酒樓……這不是我的生活，回港。來來回回幾次，離婚。”黑妹有自知之明，“我咁臭脾氣，冇啲女人味，又冇女人溫柔，曾問過相士，還有沒有姻緣？‘佢叫我死咗條心，呢世都冇。’冇就冇囉。”黑妹笑説，現在有人問我有沒有男友，我説：“有！兩個孫仔係我男朋友。”

    現階段想到Busking，“以前媽媽在中環大笪地，一手拖我，孭住細佬，唱歌賣白欖搵食。街唱，我小時候回憶，想試下。”（黑妹歷史 · 二之二）

    高梁