華探長傳奇人生

    唔識曹達華，肯定唔係港澳人。華叔於香港影圈響垛幾十年，《如來神掌》之龍劍飛，時裝片中的華探長，“銀壇鐵漢”已成招牌。從創立影片公司、擁有片場，拍片無數，乃至擁有全港首架自動波車，至晚年屈居旺角西洋菜街天台屋，人生別若雲泥，傳奇也矣。

    香港書院仔，自細迷電影，十五歲斗膽與同學到上海投考電影公司，又畀佢中咗。返港後發揚光大。唯香港淪陷時，曾賣故衣為生。戰後與胞姐合創影片公司，片務蓬勃，自擁片場、戲院，亦曾擁過半條街物業。

    又係賭字害人。上世紀六十年代來澳拍《海角驚魂》，偶入賭場玩廿一點，贏咗，慘矣！成副身家日後皆入賭場庫房。坊間有人計數：華叔輸咗三億。

    老友林蛟同佢解畫：片場係燒咗，戲院則租貴，所以冇晒。是耶非耶，無關重要矣！數十年打拼，收足名譽，冇晒身家，然照樣人生，華叔果然鐵漢。今日乃華叔百零八歲冥壽。

    西門公子