余思霆鄺潔楹日本遇招親

    曾志偉帶領周奕瑋(Jarvis)、陳嘉慧(Erica)、余思霆、鄺潔楹(Judy)主持的旅遊節目《日本限定Super遊》，新一集到日本人均壽命最年長的長野縣探索長壽之道。Jarvis、Judy和霆霆去到安曇野知弘公園，跟一名七十五歲的婆婆學整烤餡餅，由於Judy和霆霆表現不錯，導師婆婆即時為自己的二十歲孫仔求親，笑言兩人可以嫁往當地做長野新抱。之後Jarvis、Judy和霆霆去到被譽為“日本最長壽之村”的松川村探索長壽之謎，當地老友記生活寫意，每月均會舉行一次卡啦OK大會，齊齊上演“老年好聲音”。另外還有記憶力麻將大會，Jarvis與老友記攻打四方城，但不諳日本牌慘食詐餬。

    之後一站，Jarvis、Judy和霆霆去到信州長屋酒場食好西，大歎冰下魚、炸凍豆腐和野澤菜天婦羅等美食，Judy更獻出人生第一次吃馬肉刺身。曾志偉又帶大家去到長壽食堂，品嘗二十四節氣系列鄉土定食，大部分菜式都標示了減鹽及有卡路里標籤，夠晒健康。接着Jarvis、Judy和霆霆一同參觀善光寺，相傳身體邊度唔舒服，只要撫摸寺內的一座佛像相應位置，佛像便可為其承受病痛。Judy笑言：“我想高啲，係咪摸佢隻腳就得？”隨即被圍攻，Jarvis窒她：“生得唔高，唔係病痛嚟㗎！”霆霆插嘴說：“你可以摸吓個腦。”場面搞笑。