必勝之選收復失地

    今日五場草戰黃昏賽，形勢兵凶戰危，睇環境賽果不會太正路，投注執生。譚文就今季沙績特佳，馬房計昨晚迄取二十七W，當中只有三W草地取得，由此可見屬沙地虎倉口。今仗草戰譚廄偃旗息鼓，全日高掛免戰牌。

    賀蘭杜夫則喜歡草地搵食，練者迄取十四W無一跑沙地取得，專攻草戰。賀廄上月中贏完“烈火戰駒”守齋多期，今仗強駒應戰，看馬匹分佈擺明搏殺。捧場客可向此廄打主意。

    第一場：六班千五米。“興測”上季高君濤贏完至今再無進帳。馬匹連敗十場評分減至有利水位，今於六班作賽佔盡優勢。“興測”拼後重新打磨再來，回師千五米路程有績可稽。此駒用梁曉傳主轡可獲減七磅，形勢有利。遇同場對手平平無奇，坐位望贏可做到。

    第二場：四五班千二米。“必勝之選”上仗跑同程由普健士搏殺，惜騎者埋門坐包廂，最終只跑回第三，馬匹應贏變輸，捧場客敗得無奈。“必勝之選”拼後改配牌仔劉傲再來，今次原程續戰正合發揮。此駒前後兼具，欣逢路合檔宜，冀收復上仗失地。

    第四場：二三班千五米。“美麗人生”上仗千二米查維斯掛帥遊河歸來，此役騎者根本無搏過，敗難作據。“美麗人生”拼後增程再戰，改由高君濤主轡配搭堅強。此駒千五米實力雄厚，後勁可取。此番人馬重逢，勝望至高。