喜運孖寶難覓敵手

    澳馬戰火續燃，今午上演五場草地黃昏馬兼轉播六場馬來西亞賽事。是仗草地移欄八米角逐，外地馬兩點十五分開跑，本地賽四點正響鑼。綜觀大局，各場出馬有限，形勢依然緊湊，混戰局面暗藏殺機，賽果爆冷唔奇，投注小心推敲。騎師除普健士及張志立停賽，續由上仗原班人馬出戰。

    筆者心水推介，第五場四五班千二米，何華麟廄“喜運孖寶”可做馬膽。此駒上仗千五米快放走來有頭冇尾，拼得梗頸四，所負無多。今次復爭首本路不同估計，改配牌仔劉傲執韁，憑減磅之助，可勝此仗。

    “喜運孖寶”今季成熟進步走勢轉好，五戰同程取兩勝兩位，交得算準。此駒質素不高，勝在年輕力壯未用盡，且狀態長期見好。上仗中距離敗後重新打磨，今轉跑此程正合腳法。劉傲操刀倘發揮得宜難覓敵手，贏面高於一切。