亞馬遜雨林拍旅遊片

    洪永城冒死跳河游水

    前日，洪永城( Tony)、胡美貽( Nicole)及布樂文(JB)亮相將軍澳電視城，宣傳J2節目《阿媽唔信我去亞馬遜》。Tony與JB無懼盲眼，照跳落亞馬遜河，胡美貽被誤認是韓國人氣女團Black Pink的 Lisa而自覺好紅。

    身為旅遊達人的Tony表示，已有三年多未有拍攝旅遊節目，笑言因日本、韓國已滿足不到他， 所以今次選擇帶觀眾去亞馬遜熱帶雨林冒險。

    近年以拍綜藝目為主的Tony，被問到何時再拍劇，他說：“籌備緊《凶宅清潔師》第二輯，故事已經寫好七、八成，但依家要延期，延期有好多因素，要等公司拍板，（情況樂觀？）唔係自己可控制嘅嘢好難講。”Tony說，此行所到的地方相對較安全，不過都要靠兩位後生幫他這個“旅遊Old Seafood”壯膽：“人到咗某個年紀，又有小朋友就會有負擔，想留喺個舒適圈，有時同小朋友去公園就算，同埋而家都會多留意住周圍環境同人。”

    他又指最驚險是冒住盲眼風險跳落亞馬遜河游水：“之前當地有受訪者話，跳完亞馬遜河就盲咗，我都驚，但都照樣同JB一齊跳，好在返嚟冇事，仲有手有腳。（太太有冇擔心你？）佢冇反對，恨不得我快啲走……去拍旅遊節目，咁佢就可以獨霸個女，（生多個就唔使爭？）努力中。”

    染了一頭金髮的Nicole，則被當地人誤以為是韓星，她笑說：“有兩個女仔以為我係BLACK PINK嘅Lisa，要同我合照。”Tony則取笑她以為自己好紅。Nicole又稱此行帶了泳衣前往拍攝，怕冇用武之地：“因為我唔識游水，同埋導演拍我着泳衣會畀動物食咗。” Tony又大爆出名怕醜的JB，有做旅遊節目主持的潛質，而且行程中還吸引很多異性邀約，他自問以前後生都不及JB勁。