學友新馬仔共同秘訣

    歌神張學友，身懷歌唱絕技，教不教人？他自己說：“不識教人！自己不是學院出身，沒人教過我唱歌，我也沒有教過別人。”億元戲金邀上歌賽當評審，不幹！三問：張學友教人不教人？細看訪問，非常婉轉……“我不教人；但，自己日日教自己，信者得救，歡迎偷師……”

    學友仔，你聲靚歌好聽，如何修煉得來的？財金前高官馬時亨，金曲之父張文新，直探問題核心。“我入行快四十年了，除了開演唱會之外，我堅持……”

    “每星期練足六日歌。”張學友分享靚聲秘訣，“每日，練歌有時兩個鐘，亦少不過四十分鐘到一個鐘頭，專門練唱一些自己唱唔到的歌……”

    吓？歌神噃，都有歌唱唔到？馬時亨彈起，張學友悠然回應——“我好多歌都唱唔到口架。好似《藍雨》，我就錄咗好多次，而且錄咗好耐，呢啲歌，你唔練一個禮拜，再唱，會辛苦少少，如果冇練三個禮拜，直情係要從頭來過……”張學友自揭歌神的秘笈普通過普通，八歲到八十歲歌迷都清楚：拳不離手，歌不離口！

    岔開一筆，好聲又好聽的伶王新馬師曾，每次記招後，都有人趨前貼身問貼士，點樣可以唱到你咁好聽……新馬爽朗回答：多啲聽我唱歌啦。後來，傳出他授徒秘笈：多啲唱我歌啦。師父的歌藝高超，你唱唔到！照唱！行又唱，企又唱，唱得多，試試這試試那，終於會唱得自然一順溜……隨團訪港內地某紅伶，聲言要向新馬拜師，得蒙“家宴招待”，即問即答，新馬會起筷子敲桌作叮板，即席授徒，後來問紅伶，“新馬教了甚麼？”“師父只係示範兩句歌，……不過”已受用無窮，此歌節奏複雜，至緊要識得“偷氣”和“抖氣”，新馬腔節奏的“妙位”了……好難唱到，行又唱，企不唱，瞓唔着都唱，漸漸會唱到……此伶後以“新馬腔”馳名。

    後記：新馬仔出名教你都學唔到，張學友億元請不到上台教後輩，但，他們早已公開寶藏：曲不離口。但，要注意休息，炎明熹則太攰了……

    高  梁