不為逾億酬金打動

    張學友拒當歌賽評審

    “歌神”張學友與張文新前晚亮相馬時亨主持的《馬時亨 · 香港情》節目，擔任受訪嘉賓。張文新與學友相識接近四十年，對學友性格及過去均瞭如指掌，全程與主持人馬時亨向學友“大逼供”，學友亦大方回應。

    在節目開始時，學友首先剖白當年為何“唱唱吓歌走去拍戲”，他表示：“我都係被逼嘅。當年我出到第四隻唱片時，到了一個算係‘迷失期’，想做但唔知點做。當時唱片（銷量）由廿幾萬隻，然後跌到十萬，跟住去到二萬五千，跌得好犀利。我係家庭支柱，要搵收入養家，嗰時有人搵我拍戲，真係乜都接喇。”

    談到當年忽然推出一張全部由自己作曲填詞的大碟，學友透露全因當時心情不好：“嗰隻碟係○三年做嘅，當時社會環境唔好，好多朋友走咗，所以我寫咗隻《給朋友》。嗰段時間想做啲嘢反映心情，我係做嚟安慰自己。”學友又說不排除將來還會繼續嘗試作曲填詞。

    張文新追問學友，傳聞指有製作單位出到九位數天文數字報酬，亦未能打動他為歌唱節目擔任評審及導師，到底是否屬實？學友大方承認：“我自己都係比賽出身，好唔忍心批評話呢個唔得嗰個唔得。第二，去到做導師或者要教唱歌，我唔知點樣教呀，我本身都唔係正統學唱歌出身。”他又指以前做歌手靠運氣，現在做歌手，背後要有系統的支持：“有韓國嘅例子，佢哋有系統咁培養新一代，仲成功將國力提升。人哋咁樣做緊嘅時候，我哋仲喺度食緊老本。”

    學友承認對香港有特別的感情及情懷：“因為我喺呢度出世、長大，喺香港得到我所有嘅嘢。二、三十年前，有人提議移民，我去過加拿大領事館，但諗到以後要對住嘅全部都係外國人，個心就頂唔順，最後走咗。我自認係裙腳仔，黐住喺度，對香港嘅感情真係放唔低。”