夠響識贏 直路退敵

    今日草沙混戰形勢吃緊，因賽前連場大雨，料賽日場地會起變化，今仗若打水戰賽果爆到七彩唔奇。馮耀正廄暫以一W帶頭，近期攻勢放緩，練者要讓戰駒回氣休息，今日只兩駒參賽，似志不在此。

    林宏基近期出擊頻添進帳，現落後馮廄一W排名次席。以基廄目前兵源實力，月內隨時可扒頭。今仗七駒列陣大軍壓境，論馬頗具爭勝實力。練者藉近期氣勢出擊，睇環境又可增添進帳，臨場吼緊動態。

    第二場：四五班千八米。“夠響識贏”質新馬愈跑愈好，近兩仗千八米贏來無懈可擊，拼後小休復爭同程正是拿手好戲。此駒跑長途氣量充沛，連次可憑一條直路退敵。此番再交劉永康執韁騎者已摸熟馬性，原程續戰路合無疑問，可爭取三連冠。

    第三場：二班千二米。“艷姿媚”上仗轉倉初出，憑後勁闖入冷連贏，生氣復現。此駒拼後重新操練，狀態持續上升。“艷姿媚”本質不弱，沙地起家，草地同程有勝績。今番改由普健士主轡配搭亦強，復爭千二米路合磅輕，有力挑戰同組任何強敵。

    第五場：六班一三五○米。“大灣玫瑰”上仗同程飲恨第二，雖敗表現仍佳。拼後回班出戰，由牌仔特蘇日主轡有減十磅之利。此駒質素不高，勝在年輕力壯未用盡，拼後重新打磨，今仗幕後擺明要攻堅。此駒路合且對手無多，拼盡可勝此陣。