康華為新劇拉筋操瑜伽

    前晚新劇《法言人》第三集中，康華以空中瑜伽“半天吊”的亮麗方式出場，五十一歲的她動作優美、身型及皮膚均弗到漏油。為了這只有數秒的鏡頭，康華事前專誠上堂學瑜伽。本身有舞蹈底子的她笑言上堂前很擔心：“因為真係好耐冇做大幅度拉筋，所以一知道要咁就Keep住每日做十五至三十分鐘拉筋。上完第一堂時真係周身痛，大髀畀啲繩勒到瘀晒，我先知原來咁辛苦，空中瑜伽唔止要柔軟度，都仲有好多力學同技巧喺入面。因為空中瑜伽啲衫有啲蝦人着，所以特別留意飲食之餘，差唔多日日起身都做半小時運動，修肚腩、手臂同大髀。”

    皮膚白淨的林夏薇劇中演律師，她保養得宜獲封索爆女律師。薇薇分享護膚秘技：就是幾忙也不能偷懶，落妝要落得好乾淨，保濕要做足，得閒敷面膜，多飲水、及以蔬果水補充維他命C，做到內到外配合。馬國明在兩線劇均擔正，在新一輪《法言人》宣傳片中，被TVB抽水以“香港職場森川葵”為主題，播出大量他以往演出劇集及綜藝表演的片段，包括“天然呆”跳唱、扮風騷馬姐、的士司機，超級大律師及招牌職業醫生，非常抵死，除貫穿潮語“一理通馬國明”自幽一默，結尾更曲線恭喜他好事近。