澳科四彈捕“鋒”

    【本報消息】本地甲組足球聯賽，榜首澳科鄒北記強勢搶六連勝。梁嘉恆梅開二度，澳科四比○大勝青鋒，繼續穩坐榜首。蒙地卡羅有法蘭廉入兩粒，五比○大勝大部分時間十人應戰的士砵亭。

    甲足昨日下午三時在蓮峰上場前列大戰，衛冕的澳科新球季繼續強勢，第六輪硬撼青鋒，前線由艾美達、梁嘉恆、迪亞高等領軍。青鋒同樣排強陣，高美斯、朗尼利、艾歷臣等三箭掛帥。開賽十三分鐘，梁嘉恆禁區頂窩利勁射破網，澳科迅速領先。四十分鐘，迪亞高遠射入靚波再次收死青鋒門將馮智恆，半場淨勝兩球。六十分鐘角球攻勢，艾拉奧祖頭鎚二傳跣後，杜亞迪門前撞入，澳科擴大優勢至三球。強攻的澳科尾段再有斬獲，林嘉誠禁區內窄位勁射被馮智恆救出，梁嘉恆補射入網，為澳科埋齋大勝四比○。

    蒙卡五球拆“亭”

    尾場有次席的蒙卡迎戰尾二的士砵亭，連斯十三分鐘接應法蘭廉傳中撞入，蒙卡領先一比○。卅二分鐘，胡柏林禁區外拉跌法蘭廉兩黃一紅被逐，踢多個的蒙卡之後由張海山開角球，省中黎國豪烏龍入網，半場已有兩球優勢。李漢浩五十一分鐘撞射建功，法蘭廉完場前補時梅開二度，蒙卡五球大勝士砵亭，兩分落後澳科續排次席。