哥普拉影壇跌宕

    法蘭西斯哥普拉，有問：乜誰？睇過電影《教父》冇？此公就係導演。上世紀七十年代，拉哥混跡荷里活，拍片焦頭爛額，畀法院拉人封艇，走投無路，無奈被迫接拍《教父》。

    本不情不願，卻富貴迫人。七百萬本錢，竟大收三億，拉哥名聲乍響，欲罷不能。續集盛況依然，拉哥於影壇平步青雲。終於三集面世，横跨十九載，奠定影壇教父地位，《教父》三部曲，亦成經典。

    拉哥拍教父，出埋私伙。女兒索菲亞剛出生，即於首集結尾出演受洗女嬰；十八年後，有女初長成，索菲亞高中畢業，即演一號女配。雖獲評“最差新人兼最差女配角”，依然無損其經典角色。

    然拉哥亦非運財童子，重金拍《現代啟示錄》，意圖以戰爭講人性，卻衰到貼地；唯《吸血殭屍驚情四百年》執返個彩，被喻為“至豪殭屍片”。

    今日係拉公八十四齡壽辰。

    西門公子