昨晚賽事總投注二百一十二萬

    高君濤譚文就起孖

    昨晚沙地賽完結，是仗淨跑五場本地馬，總投注額共二百一十二萬元。

    頭場高君濤騎譚廄“豐收日”先拔頭籌。此駒連仗跑入位置未竟全功，上次草地千五米埋門輸個鼻，敗得無奈。拼後強配高君濤轉戰沙地，被捧成頂頭大熱，獨贏只得十六文。騎者出閘快步跟出守好位，直路發力衝剌，埋門輕取對手。“豐收日”一向易位難贏，今次用到冠軍騎師執韁，終於贏馬破悶局。高君濤、譚文就攜手添頭馬。

    第二場高君濤連中兩元。此子贏完頭場乘勝追擊，是場騎馮廄“友心”以一貫搶放跑法，出閘拍住廄友“飲就兄弟”而走，沿途小心翼翼，入直路發力甩開對手直奔終點。此雙人馬上次大熱門跑梗頸四，今次原裝配搭戰原程，贏來從容不迫，跑完獨贏有三十八元分頭算不俗。馮耀正廄增添一W，騎者搏殺取得一口孖寶，收穫甚豐。

    第三場牌仔劉傲勁爆王君適廄“愛神之駒”。此子上次替此駒執鞭跑得第六，雖敗未脫節。今次原配轉戰一三五○米，憑較佳留放後上挫敵，騎來發揮得好爆四十七倍大冷W。適廄喜添頭馬，劉傲取得今季第九W。

    第四場譚文就廄起孖，旗下“森林木”由中野省吾操刀，以快放本錢走返。此駒季內連仗落敗，上次拼後小休再來，今次回配中野省吾主轡發揮又不同。騎者出閘三扒兩撥放出帶頭，全程一氣呵成走返，贏來全無壓力替馬房完成起孖任務。

    尾場余健雄食尾餬。此子騎陳俊輝廄“年年冠”，後上險勝爆十倍冷W。此駒上次任布利跑同程殺入連贏，拼後換人再戰。今次由余健雄押陣發揮得宜，一條直路撼低對手，替馬匹補中。陳俊輝廄喜添一W，騎者記一功。