吉列響朵靠兵哥

    吉列，唔係豬扒，係鬚刨。此男人恩物，面世百餘載，歷兩次世界大戰，男人於今依然冇佢唔得；女人亦然，剃手毛腳毛，都要靠佢。此乃近代工業史上最巧妙設計，最成功商品，賣足百幾年，誰可比肩！

    吉列因家道中落，輟學做“修士”。為博客戶好感，每回推銷產品都要剃鬚扮靚仔。傳統剃刀麻煩兼論盡，不時刮到花面貓。佢怒擲剃刀，發誓要搞件方便剃鬚刀，造福世上男士。

    有次推銷瓶塞，奇怪為何銷量奇佳。老闆教路：用完就丟，方始陸續有來！吉列登時開竅，整張用完即棄刀片，方便快捷兼經濟。

    然此物初出，市場並不領情，銷量慘淡。適逢第一次世界大戰，吉列以廠價供美國大兵使用，一剃上癮，成就大批粉絲；二戰亦然，係美國兵哥幫佢賣招牌，乃至戰後全世界都知道有吉列鬚刨。

    一百廿一年前今日，吉列成功申請鬚刨專利。

    西門公子