蕭正楠入行廿年圓開騷夢

    日前蕭正楠(Edwin)、伍仲衡(Harry)及區永權(Albert)作客TVB娛樂新聞台節目《StarTalk》，接受許文軒訪問，談三人開騷感受。Harry說：“我哋冇刻意去搞騷，就好似之前開網上Live都唔係刻意，因為自己真係好鍾意玩音樂。估唔到三個人開完Live後，跟住又可以一齊合作節目《總有歌聲喺隔離》，再演變成今次合作開騷。我都冇惗住整個組合出嚟，但人一世物一世咩都試吓。我覺得我哋可以跳下舞。我哋唔係專業，當然唔可以同草蜢比，但我想跳出舒適圈，所以咪要突破自己。”

    Albert自爆被太太叮囑他不要胡亂說話：“因為我哋三個走埋一齊就會亂噏嘢，個防線好低。”適逢蕭正楠入行唱歌廿年，他說：“今次可以話係圓夢，其實呢個音樂會自己想做好耐，因為疫情冇嘢做，開始拎返個結他出嚟，跟住開Live唱歌，又咁啱做咗關心妍二十周年演唱會嘉賓。既然係咁，不如自己都做啲嘢，想回饋粉絲。因為佢哋由歌迷變成影迷，佢哋都成日叫我唱返啲舊歌，但可能我有啲陰影，有啲抗拒，所以平時登台都好少唱自己歌，今次係一個好好嘅機會。”