關心妍與學單簧管囡囡Jam歌

    一連三晚《HKGNA樂在維港音樂節》圓滿結束，尾場關心妍(Jade)、男團P1X3L接力演出，成為音樂節焦點。關心妍伙拍管弦樂團唱出多首名曲，笑言“餓足三年”盼唱戶外騷，呢晚終於夢想成真：“因為疫情都冇咩機會唱戶外騷，呢晚難得同管弦樂團一齊表演，所以揀歌都有啲私心嘅。今次音樂節會轉播去韓國，所以唱韓國改編歌《失戀哲理》，當地人聽唔明都會有回憶嘛。另外仲揀咗唱張學友嘅《愛是永恆》，因為演奏出嚟好有氣勢，我全程都望住囡囡唱，見佢揮晒熒光棒，應該都好投入。”

    Jade話囡囡正學習樂器，希望未來可一齊表演：“因為佢學緊單簧管，唔知佢練唔練得切，下次演唱會就可以唔洗打筋斗一齊Jam歌。其實都想去美加做巡迴演唱會，可以順便探吓親友。不過囡囡太黐身啦，唯有放假先一齊飛，所以海外做騷都只可以學校長假先可以舉行。”男團P1X3L話表演好興奮，Marco坦言估唔到咁多粉絲支持自己。Phoebus就話食飽先上台，毫無偶像包袱。George就好識做，做完訪問即刻出去口氹粉絲，坦言終感覺到“男團”嘅身份。