袁偉豪拍MV：楊埕好好抱

    袁偉豪(Benjamin)最近推出全新單曲《馬路英雄》，昨天在上環舉行MV試映會，太太張寶兒、在MV友情演出的羅家英及多位圈中好友林子善、謝東閔、葉泓聲(Gordan)、商業合作伙伴、公司台前幕後製作團隊齊出席支持。Benjamin說為增添MV的浪漫感，特意在拯救女主角楊埕(Sabrina)的情節上，以比較唯美的方式拍攝。“我拯救Sabrina時要由車上抱起佢，而佢就喺我心口攞把槍出嚟。整個過程都比較順利，好彩佢唔重，而且佢都好smart，一講即明，所以只係拍咗三個Take就有想要嘅效果。”

    家英哥在MV友情主演飾演特務老大，Benjamin非常感謝家英哥：“家英哥係一個好好嘅前輩，經常好撐我哋後輩，今次拍攝過程及前後多謝佢付出咗好多耐性，未來有機會希望再搵佢合作，或者佢有咩需要我幫手我都會義不容辭。”此曲整個製作，包括曲詞編監均由Benjamin一手包辦，他非常感謝唱片監製Terry Chan：“Terry係一個好資深嘅音樂人，我同佢喺音樂上有一個好好嘅溝通，佢好了解我喺音樂上想要嘅嘢，好多謝佢今次畀到好大嘅創作空間我。”