心穎復出  安仔潛水

    “安心事件”三年了，黃心穎與樂隊鼓手新男友“泥鯭”拍拖遛狗，她笑嘻嘻接受記者訪問，“我與前公司（無線）已經完咗約。（有乜大計？）享受吓自由身先。（有冇諗結婚？）都想結婚，但要等等，我會諗咗事業先。”心穎在娛樂圈消失三年多，大部分時間足不出戶，平日沒有男朋友在身邊，就會獨自到公園遛狗，多數黃昏出動……

    有時則由“泥鯭”負責帶狗落街，相處模式已如老夫老妻。雖然心穎幾年冇工開，但看似水頭依然充足，被發現最近換了新車，原本駕駛過百萬的辣跑，已換了同牌子的最新型號。又傳，她以低於市價一成，急讓啟德豪宅，賬面獲利百萬，果然投資有道。

    黃心穎靜極思動，承認戀上“泥鯭”，並賦同居。其舊愛馬國明大方回應：“當然祝福啦！希望佢開開心心。”

    許志安當年背妻偷食黃心穎，形象瞬間破產，事業幾乎一鋪清袋。幸得老婆原諒，又有舊同事出手助他過檔環球唱片，以為有機會洗心革面邁上新征途，不料自三月簽約後，幾個月下來，一直未有動靜，他的社交網亦已近兩個月沒有更新。據知，安仔已秘密穿梭香港台灣，灌錄了幾首歌，但仍未有推出日期。他東張西望，明顯看得出心理障礙未除。當日爆出醜聞後，他立即鞠躬致歉，自嘲是“一個壞咗的男人”。作繭自縛的他，仍敵不過心魔，幾次企圖面對群眾，都頗見猶豫。年前，安仔到台灣拍劇，起哄一陣子，沒有下文……

    不受心穎“約滿復出”消息影響，前男友馬國明一臉風騷出席《白色強人Ⅱ》宣傳活動，與粉絲開心互動，大曬愛情事業兩得意——與湯洛雯感情穩定，經常恩愛出巡，已經認定對方。

    聲言寧要獎金不要視帝的馬明，與《白Ⅱ》劇中的戀人唐詩詠拍了宣傳短片。兩人坐定定，其樂無窮的是配上鄭君綿、鄭幗寶主唱的經典粵調《係唔係嘅啫》，兩人七情上面地配口形配動作，視帝視后一身醫生打扮，齊齊大曬搞笑才能。

    高梁