親力親為包辦詞曲MV

    Strayz自資出道

    由參加《全民造星4》而認識的VAL、CK、暐翹、榛綦及Ariel，自資組成女團Strayz出道。出道歌《Stray》昨日正式推出。MV中眾人以黑白造型登場，顯示勇闖樂壇的決心。

    Strayz隊名源自Stray（流浪），隊長VAL、副隊長CK、暐翹、榛綦及Ariel 五人自喻為“一班流浪的小朋友”。出道作品《Stray》由VAL及CK作曲，方浩權、VAL及PetPetShawn填詞，當中的創作概念與隊名亦如出一轍。VAL說：“新歌講追夢路上可能會遇到困難，但只要努力，堅持我哋想走的路，就可以搵到一條出路。”

    為了突出她們的想法與加入樂壇的決心，歌曲的MV也特別花了心思，以黑白兩個搶眼造型示人。CK介紹兩個造型：“第一個係喊妝，配以全白歌德風格服裝，象徵對於流浪呢件事情的傷心、不忿、不甘，但係我哋其實係好純潔的動物，都有一顆赤子之心。第二個造型有臉部動物彩繪，身上着比較正統的黑色服裝，象徵我哋反璞歸真。”

    由於自資出道，暐翹坦言五個人用了很長的時間構思MV怎樣拍：“眾人都積極參與發表意見，CK則幫了個大忙，充當導演執導MV。”這次是CK首次執導，她說十分緊張：“因為想貼近大家的故事，所以就踏隻腳落去做埋導演。但原來執導時係會遇上好多困難，做過才知道不論係導演、幕後，甚至任何一位參與拍攝MV的都好偉大，要向佢哋致敬。我體驗過，才知道係好辛苦的工作，無論由計劃、到團隊與不同單位，例如攝影組、服裝組等溝通過程都好艱難，我唔係好識點樣表達自己想要乜，結果導致拍攝有延誤。但係我從中學習到好多，希望大家會鍾意今次成品。”

    暐翹也感激不同單位的幫忙，更慶幸這個自資出道的旅程並不孤單。她說：“組團後大家成長咗好多，以往參與《造星4》，大家會放焦點在表演上，但成為Strayz成員後，就發現其實表演或拍攝唔係得自己一個，仲要兼顧好多事。所以除了工作人員，更要多謝隊中另外四位隊友。”

    談到首次拍攝MV的難忘事，Ariel笑言：“我哋五點鐘開始化妝，完成後已經係第二朝十一點。出到街見到天光，大家都唔識反應，好似就攰到死咁，但係當日真係好開心、好好玩。”