馮允謙感謝江海迦鼓勵

    馮允謙(Jay)前晚進行紅館騷第二場，並邀請了“唱作才女”江海迦(AGA)擔任表演嘉賓。Jay親自落台迎接AGA，手拖手合唱AGA的人氣作品《3AM》，全場歡呼和應並大合唱。

    Jay介紹AGA出場時說：“彈琴非常之好聽，佢寫每一首歌、每一個作品，我都會畀錢去買來聽，因為佢好值得欣賞，去年我哋仲喺一個音樂活動合作過。”AGA對Jay說：“今日真係好開心，你請我做嘉賓，多謝你同我分享舞台，你係值得的！”

    Jay與AGA在台上憶當年：“我哋曾經一齊去上海參加馬拉松，當時係我事業低潮期，寫咗好多歌，在那一程飛機上，我畀AGA聽，其中一首係《一步一悔過》，當時只有我另一半聽過，AGA係第二個人聽呢首歌。”AGA受寵若驚地說：“噢，我好開心！最記得那次去跑馬拉松，起跑前，Jay話自己冇練習，點知一起步就快到唔見咗。”觀眾爆笑，她續說：“那程飛機本來好攰但冇瞓覺，因為Jay畀咗好多歌我聽。印象最深刻係佢問我：係咪我的歌唔夠好？但我覺得歌好好聽，雖然係當時唯一的聽眾，但覺得佢將來會變得更強大。”

    Jay很感激AGA當年的鼓勵，他說：“當時以為冇人要呢首歌，但你話鍾意，畀咗好多鼓勵我。所以我同自己講，有朝一日我一定要將呢首歌派台。結果《一步一悔過》推出後成為二○二○年度流行榜冠軍歌。”之後Jay退場，留下AGA獨唱《Superman》，全場氣氛高漲。