雷有輝無懼疫情出碟

    雷有輝（Pat哥）今日生日，推出新唱片《二十才前》來慶祝，並發佈第二首派台歌曲《平行空間》。

    生日在即的Pat哥透露未有慶祝大計，打算暗訪CD店睇銷量：“如果見只得一個人買，咪衝出去幫佢簽個名，多過兩個人就唔行埋去啦！依家都冇晒堂食，冇得慶祝啦，之前計劃的粉絲聚會都要押後，最多同囝囝切蛋糕慶祝囉。”

    新年期間，Pat哥在網上向粉絲拜年之餘，更自彈自唱生日歌慶祝。近期香港受疫情影響，Pat哥坦言擔心疫情多於銷量，更呼籲粉絲安坐家中：“其實依家唔係出街先有得買CD、聽歌，上網都可以買我的歌來聽，不過CD就係限量版，要靠上網訂啦。一齊抗疫，希望病毒快啲走啦！依家我唔會周圍去，最多係落樓買飯盒咋。以前我就可以周圍飛，呢兩年多數留在屋企。多咗家庭樂時間，但磨擦都多咗，當係了解對方的方法之一吧。”

    Pat哥亦表示唱片籌備多時，專輯將出黑膠唱片、錄音帶版本，帶出四十年前的情懷：“新碟都係講返中學時期，應該係大家最開心時刻，當搵返啲開心回憶囉。”