石修情人節唔送花

    情人節遇上元宵節，“如果老婆要我送花？”結婚四十七年的石修胸有成竹：“我話，你嫁畀我，不是為了這朵玫瑰花。我成個人都畀咗你！如果需要，我可以將自己包起，紮隻絲帶蝴蝶行過來！祝大家日日都係快樂情人節。”

    童星出身、入行六十六年，今年七十四歲的老戲骨，贏得了“零緋聞”美譽。石修承認有時都會心思思想出軌：“拍戲一定要投入，否則拍感情戲會格格不入。劇情慢慢發展，一定會跟對手產生好感，觀衆都希望你哋有呢種感覺，睇落才會舒服。一套戲拍兩個幾月，思想上就不時會踩界。幸好我識得返屋企，呢種思維就會自動消失，慶幸自己夠冷靜。”

    拍拖八年、結婚四十七年，感情長達五十五年，石修至今依然多謝太太信任，在工作上給他很大空間。石修説：“佢係新界校長個女，我十九歲、佢十四歲，那時她不知我拍戲的。有次，我同森森拍《聰明太太笨丈夫》，講我角色走私，畀老婆追到彌敦道，着條底褲從的士落車。我女朋友剛好放學經過，她見到我着住條底褲跑來跑去，先至知我係拍戲嘅，但佢冇嬲。”

    “老婆、兒子、媳婦，全家人都是我的情人！”石修還提到有情有義的朋友，最是難忘“秋官”鄭少秋。“當年，我因胃炎暴瘦，由一百五十磅跌到一百二十磅。秋官好關心我，知道九龍仔公園有個太極師傅，佢話同我一齊去學。第二朝六點幾，秋官已經在九龍仔公園亭中等緊我。佢好有心，陪咗我兩個星期，鼓勵我繼續學下去。後來，我眞係好返，不經不覺已不見秋官十年了。”

    石修與米雪係熒幕上最佳拍檔，現正合作拍攝有關粵劇的電影。為償觀眾所願，今回有情人十指緊扣了。“同雪姐合作好開心，佢好有經驗、識照顧現場氣氛，對於這些‘密切接觸者’，我當然會介紹畀太太認識。其實，雪姐一早識得我太太，佢好放心！”

    高梁