蘇韻姿音樂劇被中文考起

    蘇韻姿日前為音樂劇《我們的青春日誌》番外篇《Nancy勞軍SHOW》獨擔大旗演出，又跳又唱十多首經典歌曲，包括：《浮誇》、《酷愛》、《越唱越強》、《可惜我是水瓶座》等。蘇韻姿自爆被《越唱越強》考起：“我覺得自己越唱越弱，因為啲歌詞好密、節奏好快，好似急口令咁，我睇容祖兒演唱會，見佢唱得好輕鬆，但我唱就好難，覺得祖兒真係好犀利。”

    在今次音樂劇中，蘇韻姿除了在舞台演出外，亦參與幕後創作，包括度橋及服裝統籌。她說：“其實喺二○二三年已經有呢套番外篇嘅構思，不過真要有晒劇本同排練，就三、四星期前先開始，所以籌備時間都好趕。過程中最大挑戰一定係中文，好多歌詞同對白都好難背，加上難度好高係成個騷一個人Hold，如果唔記得台詞冇人救自己，所以要好熟，同埋喺現場會同觀眾有啲互動，執生好重要，真係好大挑戰。”蘇韻姿圈中好友“鬼妹仔”黃碧蓮亦有到場，蘇韻姿笑說：“我哋大家中文都差差哋，我問佢會唔會睇唔明，佢話我都明，佢一定會明。”