李小龍“反骨仔”冤案

    油麻地“金漢”、“地痞”兩大酒樓，當年的粵劇伶人茶座。尖沙咀漢宮京菜，假日酒店咖啡座，電影人的飯堂，許多電影公司在附近，南北影星交輝，光芒耀目環境下，發生一宗眼睜睜的“冤案”：一直夠膽公開稱李小龍為“反骨仔”的，華南影帝“二哥”吳楚帆。事緣：《唐山大兄》報捷多人問吳二哥，你係恩師，可有搵小龍拍電影？“呢個反骨仔，我唔會搵佢拍戲……。”李小龍香港童星出身，第一部彩色粵語片《人海孤鴻》，吳楚帆老闆，兼主角、編導的出品，口碑甚佳，李小龍挾譽赴美發展……。

    “有日，我在漢宮飲茶，見個衰仔遠遠行埋來，附近經過，頭岳岳，唔同我招呼，行咗去。”二哥老氣橫秋，嘆曰：“發咗達唔識人，正反骨仔。”之後，每提到新聞多多的李小龍，均以代號“反骨仔”。很快證明是件冤案，片場中人皆知，小龍手腳利落，有一盲點：五百度近視，不戴眼鏡，人多雜亂場面，視像不夠清晰了。“當時，同行有班朋友，好擠迫，我點會唔識二哥？美國返港，好想搵二哥飲茶敘舊……。”緣來緣聚，緣去緣散，放下！

    大明星不識人，疑幻卻是真。新丁以為，伶人茶座、影人茶座，會有許多娛樂記者遊蕩；乞求師兄帶路。“可免則免”，明星忙裡偷閒，或“斟介口”的地方。閣下東張西望，會被人誤會，這記者好Heap，扮熟人黐飲黐食。老倌、明星多低頭飲茶，視而不見。一旦他招呼，你坐下，無心黐餐也變黐。

    漢宮奇遇：謝益之！大製片，大姐大黃曼梨愛婿，“你約咗朋友呀？轉頭搵我！”終於親睹著名的“謝益之飯”，波蛋牛肉飯，碟邊圍滿一匝重重疊疊菜薳，好靚好味好有益。

    高梁