高梁成繆騫人母女磨心

    出場序：黃淑儀、李司棋、汪明荃、趙雅芝，電視烽煙年代，未算很紅花旦；最紅花旦：繆騫人！她出現廣播道，所有途人都行注目禮，直到她消失視線——當年，全港不足十輛勞斯萊斯，極為矚目一架：全白色，好靚仔，車牌有A有1，裡面坐着林秀峰、繆騫人，佳視大老闆，佳視首席花旦。極品郎財女貌。公然過街，絕不隱瞞，但又似是而非……。

    某天晚上十時，編輯部忙到出煙，接到電話，對方慢條斯理：“我係繆騫人……”心諗唔好玩啦，有下文“個媽咪。”有乜貴幹？“知你好忙，約個時間，同你傾吓偈，訪問吓你呢位大記者……。”以為對方癲咗，還是記者傻咗，冷靜……。

    “交通方便，利舞臺附近一條巷……就你時間，傍晚七點，報館未發稿……”行家是也，繆騫人父親，某大報編輯兼撰寫社論。

    鬧中帶靜橫街，應邀依時入門拱手，“繆前輩好嗎？大人你好……”坐沙發第一秒即入正題，“你報道佳視內幕新聞最多，你一定同老闆好熟……”錯！高梁有碗話碗，有碟話碟，“我與林老闆完全不熟，公開場合見過幾面”。不過，澳門有林炳炎紀念堂，好大，在鏡湖醫院側邊。林家經營米業，曾是首富。所以林秀峰的得力朋友，得力伙記，也有些澳門人，我是澳門仔，而已。

    “啱嘞，繆騫人，是否與林秀峰拍拖？至於林秀峰為人……。”好一個老總級夫人，擺明車馬，訪問別間報社的記者——你係母親，應該問你女兒繆騫人……。

    説繆騫人，繆騫人就到。嘭一聲閉門聲，風一樣撲到面前，不問情由，戈指高梁大駡：“我唔歡迎你，你扯。”夫人於禮維護，“我的客人！”不是我的客人，家是我的……高梁踉踉蹌蹌被繆騫人無情力推出街，險些PK……。

    高梁