周潤發入行淵源

    晨早流流，周潤發出席攝影展“香港·晨”開幕，會場已擠滿人群，“你哋幾點到場㗎？”八點到了！發哥幽默問對方，“眞係咁鍾意我？多謝大家支持。”跟着寓藝術閒話家常，介紹壓卷之作《無題》：黑雨中的維港，極端惡劣天氣，有此佳作——“我剛好去美容……”。

    “奔七”了！行山曬太陽，臉上有雀斑！發哥直言：“我想撈下去，經常去美容——當日，去尖沙口做Facial，下午四點多，剛巧遇上黑雨，踏腳出車，眼前一亮，沉浸雨中的維港，有一隻經典綠色渡海輪，另一隻船身上有藍色的廣告，好特別，天又黑，海旁兩邊亮了燈，形成疑幻疑眞的世界，隨即取出相機和腳架，拍了三張，只一張用得，天造地設。我很喜歡這張妙手偶得之的相。”

    “將近七十，好難搵到角色畀我。我跑步多，有雀斑，唔美容，點樣撈落去……”發哥透露，現在影相比拍電影還忙：“我每日行程：早上出去影相，返屋企食午飯。小睡一會，又出去影黃昏，返屋企食晩飯後，在黑房逗留至凌晨兩三點，比拍電影還要攰，一日出兩組，冇人工，全憑興趣，自己享受……，有時仲好重，要搬工具上山，但又未必影到靚相，好鍜煉耐性。”問發哥何必捨近圖遠——點解唔影發嫂？“我影得唔靚，佢會鬧我，”笑言沒有人會買太太的照片。發嫂亦有陪同發哥出席影展。

    “攝影！我生活一部分，平時別人影我，現在掉轉鏡頭，影自己影外面世界，是另一種感受……”相中景物，對中環情有獨鍾。發哥坦言：“我第一份工在中環返工……”去年開始，發哥到中環肌肉訓練，觸景生情，不如影一些街景，抒發對中環的情懷……。

    岔開一筆，發哥第一份工，據講，由南丫島出港島搵食，日夜都在鹹魚欄，後轉酒店當門僮，這段歷史，卻與澳門人扯上關係……發仔精乖伶俐，頗得遊客歡心，有一位洋老婦，賞給門僮一個銀幣，以作留念。卻有受賄之嫌。酒店條例，員工所有貼士歸公，再重分。發仔以為銀幣屬禮物的紀念品，不是“貼士”。經理口大：一、你走人！二、報警。傳説中這位高層，澳門人，後“榮歸故里”陞更高層。禍兮福所伏，發仔去考藝訓班。人生無常！經理姓凌，一個高陞，一個巨星！天意茫茫。

    高梁