Twins巡唱當出埠

    “村史”阿Sa阿嬌，美國登台，尼亞加拉大瀑布前合照，與十七年前合照放上網。“歌迷成日問我，係咪冇食飯，點解個樣多年冇變？”……，阿Sa阿嬌，長春不老，有兩個答案值得探討。

    第一探討獨具樂觀性格，天塌落來當被冚。要真係做到，美國Reno登台，上周五早上十時，六級地震。“還在睡夢中，突然聽到房門嘭嘭聲……。”阿Sa如閒話家常：“以為有人拍門，又發覺窗門也在搖動，嘭嘭作響，即致電工作人員：是否地震？他們笑我發開口夢……。”

    “我在房內放滿了一缸水”，阿Sa愈講愈驚了：“讓空氣唔好咁乾，但成缸水搖到有波浪。我好驚呀，未試過感受到咁強烈地震，即刻跳上床，縮埋一角，頭頂沒有任何嘢的地方。”

    六級地震，地動山搖了，同房阿嬌，好夢香甜，全不受干擾，的而且確：天塌下來當被冚……。

    生活氣定神閒，情緒不大上大落，免受恐懼刺激。能不青春？“不吃飯！”粉絲的誤會；反而揭發“食得多又不老”的秘招：“今次北美巡演，我破晒戒啦。”阿Sa笑言：“過生日，甜嘢、炸嘢、澱粉質，都唔理啦，全部食齊，哈哈。”猛咁食，預咗要還，返到香港，就要戒口，勤做運動。因為，跟住要做電影宣傳，十二月到英國演出後，才有假放，期待在英國遊玩，見見英國歌迷。

    女兒志在四方，美國登後，返港，隨即飛北京工作。江湖匆匆，歌迷大讚十多年都咁靚。阿嬌表示：“好耐冇試過與阿Sa一齊巡演咁耐。好開心……美國行程冇咁密，許多時，寓工作於遊埠，結伴行吓街、影吓相，曾記當時年紀小，出埠演出又遊玩的感覺返晒來。好珍惜今次旅程，唔知下次會幾時，但係，將來還有冇巡演，我哋兩個都永遠會係好朋友……。”

    後記：行街街，擺路祭！走紅年輕女藝人的最佳娛樂享受。曾訪四雛鳳，最紅時候，最喜歡甚麼節目——擺路祭！行街、篤魚蛋、剪牛雜，邊行邊吃，大講大笑。一般女孩隨時可享受的快樂，紅藝人的夢想……。所以，她們最喜歡走埠街上自由走動，邊吃邊玩，難得自我放縱……。各位鄰家小女孩，你們的自由快樂，珍惜又珍惜。許多紅藝人夢寐以求，羨慕你們啊！

    高梁